នៅយប់ថ្ងៃទី ២១ ខែ កក្កដា ឆ្នាំ ២០២០ វេលាម៉ោង ២១:៣០នាទីយប់ ដោយគោរពតាមអនុសាសន៍របស់ឯកឧត្តមអគ្គស្នងការរង និងជាស្នងការនគរបាលរាជធានីភ្នំពេញ និងតាមការចង្អុលបង្ហាញរបស់លោកវរះសេនីយ៍ឯក យិន សាន អធិការនគរបាលខណ្ឌចំការមន អោយកម្លាំងប៉ុស្តិ៍នគរបាលរដ្ឋបាលទន្លេបាសាក់ ធ្វើការល្បាតពួនស្ទាក់ ទប់ស្កាត់បទល្មើសផ្សេងៗ នៅក្នុងមូលដ្ឋាន។
ក្នុងប្រតិបត្តិការធ្វើការល្បាតកម្លាំងអន្តរាគមន៍ បានជួបបងប្អូនប្រជាពលរដ្ឋ មានគ្រោះថ្នាក់ចរាចរណ៍រវាងម៉ូតូបុកម៉ូតូរឺម៉កកង់បី បណ្តាលអោយមានរបួស នៅមុខសណ្ឋាគារសូហ្វីតែល ហើយកម្លាំងយើងក៏បានធ្វើការអន្តរាគមន៍ ជួយសម្របសម្រួលផ្សះផ្សាររវាងភាគីទាំងសងខាង ហើយភាគីម៉ូតូរីម៉កកង់បី ក៏មានចិត្តអាណិតអាសូរដល់ភាគីម៉ូតូ ដោយមិនទាមទារសំណងពីខាងភាគីម៉ូតូ។
បន្ទាប់មកដោយសារនារីបើកម៉ូតូដែលរងរបួស មិនមានទូរស័ព្ទ និងលេខទូរស័ព្ទទំនាក់ទំនងសាច់ញ្ញាត្តិ កម្លាំងប៉ុស្តិ៍នគរបាលរដ្ឋបាលទន្លេបាសាក់ ក៏បានជួយជូននារី ដែលរងរបួសនោះទៅដល់គេហដ្ឋាន និងបានទំនាក់ទំនងគ្រួសាររបស់នារី ដែលមានរបួសនោះអោយជួយជូនគាត់ទៅកាន់មន្ទីពេទ្យ ដើម្បីព្យាបាលរបួស។
ទន្ទឹមនឹងនោះដែរ ក្រុមគ្រួសាររបស់នារី ដែលមានរបួស បានធ្វើការថ្លែងអំណរគុណដល់ម្ចាស់ម៉ូតូរឺម៉កកង់បី និងកម្លាំងសមត្ថកិច្ចយើងជាខ្លាំង ដែលបានជួយសាច់ញ្ញាត្តិរបស់គាត់ ក៏ដូចបានជួយរក្សាសន្តិសុខ សិទ្ធិសេរីភាព ទ្រព្យសម្បត្តិរបស់ប្រជាពលរដ្ឋទូទៅផងដែរ៕