កាលពីថ្ងៃទី០៣ ខែកក្កដា ឆ្នាំ២០២០ វេលាម៉ោង ០២:៣០នាទី នៅក្នុងហាងឈ្មោះ គូស៊ាំងយៀន ស្ថិតនៅផ្ទះលេខ៣៥៤ ផ្លូវព្រះមុនីវង្ស ភូមិ២ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ មានជនជាតិចិនចំនួន០៦នាក់ បានចូលមកហូបចុក ផឹកស្រាស្រវឹងជោគជាំ ក៏មានទំនាស់ពាក្យសម្តី និងបានបង្កហិង្សាបណ្តាលឲ្យខូចខាតទ្រព្យសម្បត្តិរបស់ម្ចាស់ហាងមួយចំនួន។
អំឡុងពេលកើតហេតុប្រជាពលរដ្ឋដែលធ្វើដំណើរលើដងផ្លូវបានឃើញព្រឹត្តិការណ៍នោះ ក៏បានផ្ដល់ព័ត៌មានទៅឲ្យកម្លាំងនគរបាល នៃស្នងការដ្ឋាននគរបាលរាជធានីភ្នំពេញ ខណៈនោះ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាកម្លាំងចុះដល់កន្លែងកើតហេតុ ប៉ុន្តែជនជាតិចិនទាំង០៦នាក់នោះ បានចាកចេញពីទីតាំងកើតហេតុនោះហើយ រីឯម្ចាស់ហាងបានកំពុងរៀបចំសណ្ដាប់ធ្នាប់ហាងសាជាថ្មី។
ដោយយល់ឃើញថាជនជាតិចិនទាំង ០៦នាក់នោះ គឺជាភ្ញៀវប្រចាំហាងខាងលើ ម្ចាស់ហាងបានសម្របសម្រួលស្នើសុំសមត្ថកិច្ចមិនឲ្យធ្វើកំណត់ហេតុ និងដាក់ពាក្យបណ្ដឹងអ្វីនោះទេ។
បច្ចុប្បន្ន កម្លាំងជំនាញនៃស្នងការដ្ឋាននគរបាលរាជធានីភ្នំពេញ បាននិងកំពុងប្រមែប្រមូលព័ត៌មាន វត្ថុតាង និងកសាងសំណុំរឿងបញ្ជូនទៅតុលាការដើម្បីស្នើសុំការពិនិត្យសម្រេចដោះស្រាយករណីនេះតាមនីតិវិធីច្បាប់។
យើងខ្ញុំសូមថ្លែងអំណរគុណចំពោះកិច្ចសហការល្អរបស់សាធារណៈជន និងពិសេសបណ្ដាញទំនាក់ទំនងសង្គមដែលបានចូលរួមចំណែករក្សាការពារសន្តិសុខ សុវត្ថិភាព សណ្តាប់ធ្នាប់សង្គម និងរិះគន់ក្នុងន័យស្ថាបនា យើងខ្ញុំសូមអំពាវនាវ ដល់សាធារណ:ជន និងបណ្ដាញសង្គមចៀសវាងការអត្ថាធិប្បាយ ចងក្រងខ្លឹមសារ រូបភាពសកម្មភាពបំផ្លើសការពិត ជាហេតុបង្កឲ្យភាពវឹកវរ បំពុលបរិយាកាសសង្គម ចលាចល បង្កភាពភ័យខ្លាចដល់ប្រជាពលរដ្ឋ និងអាចប្រឈមចំពោះមុខច្បាប់ជាធរមាន ៕