ក្រុមការងារព័ត៌មាន និងប្រតិកម្មរហ័ស និងលោកវរសេនីយ៍ទោ ស៊ឹម ពិសិដ្ឋ អធិការនគរបាលខណ្ឌបឹងកេងកង សូមធ្វើការបដិសេធទាំងស្រុងចំពោះសារព័ត៌មានមួយចំនួនដែលបានចុះផ្សាយថា ( មានករណី កាប់ជិតដាច់ដៃប្លន់យកម៉ូតូ Zoomer X នៅបឹងកេងកង ) នៅល្ងាចថ្ងៃទី១៦ ខែមិថុនា ឆ្នាំ២០២០ វេលាម៉ោង ១៦:៤០នាទី នៅតាមបណ្តោយផ្លូវ ៣៦០ ។
តាមពិតមិនមែនជាករណីប្លន់ដូចសារព័ត៌មានមួយចំនួនបានចុះផ្សាយបំភ្លើសពីការពិត ដែលធ្វើឲ្យប្រជាពលរដ្ឋមានការយល់ច្រឡំ ក៏ដូចជាធ្វើឲ្យមានការប៉ះពាល់ដល់សន្តិសុខសង្គមនោះទេ ជាក់ស្តែងជាករណីទំនាស់គ្នារវាងក្រុមក្មេងស្ទាវ២ក្រុមដែលដេញកាប់គ្នាដោយប្រើកាំបិតបុ័ងតោ ដែលបណ្តាលឲ្យរបួសទាំងសងខាង ពេលនេះក្មេងដែលរងរបួសទាំង២ត្រូវបានសមត្ថកិច្ចបញ្ជូនទៅមន្ទីរពេទ្យ និងម៉ូតូត្រូវបានយកទៅរក្សាទុកនៅអធិការដ្ឋាននគរបាលខណ្ឌបឹងកេងកង ។
សូមអ្នកប្រើប្រាស់ហ្វេសបុក ក៏ដូចជាសារព័ត៌មានមួយចំនួន សូមស្រាវជ្រាវរកប្រភពនៃព័ត៌មានឲ្យបានច្បាស់លាស់ជាមុនសិន មុននឹងធ្វើការផុសជាសាធារណ: ព្រោះថាការផុសព័ត៌មានមិនពិត វាអាចធ្វើឲ្យប្រជាពលរដ្ឋមានការយល់ច្រឡំ ប៉ះពាល់ដល់កិត្តិយសបុគ្គល និងអង្គភាព ជាពិសេសធ្វើឲ្យប៉ះពាល់ដល់សន្តិសុខសង្គមផងដែរ ។
សូមសិក្សាពីប្រភព និងស្រាវជ្រាវឲ្យបានច្បាស់លាស់ មុននឹងផុស កុំត្រឹមតែចង់បានល្បី ចង់បានស៊ែ និងចង់បានឡាច ៕