នៅពេលដែលលោក រីសឆាត ប៊្រុក បានដេកលក់ ខណៈពេលគាត់កំពុងទិញអាហារនៅឯហាង Wendy’s Drive-through ប៉ូលីសក៏បានមកដល់ ក៏កើតមានការប្រតាយប្រតប់រវាងប៉ូលីស និងលោកប្រ៊ុក។ រវាងមានការប្រតាយប្រតប់ លោកប្រ៊ុក ក៏បានឆក់យកបានកាំភ្លើងឆក់ (Taser Gun) ពីប៉ូលីស រួចក៏រត់។ នៅពេលដែលប៉ូលីសរត់ដេញតាម ក៏បានបាញ់សម្លាប់លោកតែម្តង។ ហេតុការណ៍នេះបានបង្កចលាចលនៅក្នុងទីក្រុង។
ទីក្រុងអាតាឡាន់តា៖ ម្ភៃបួនម៉ោងបន្ទាប់ពីប៉ូលីសស្បែកស បានបាញ់សម្លាប់បុរសជនជាតិស្បែកខ្មៅម្នាក់ នៅខាងក្រៅហាងលក់អាហារលឿន (Fast-food restaurant) ចៅហ្វាងក្រុងអាតាឡាន់តា បានប្រកាសកាលពីថ្ងៃសៅថា មេប៉ូលីសបានលាលែងពីតំណែង និងអំពាវនាវឲ្យមានការបញ្ឈប់ការងារប៉ូលីសដែលពាក់ព័ន្ធនឹងការបាញ់សម្លាប់បុរសស្បែកខ្មៅនោះ។
ការបាញ់សម្លាប់បុរសស្បែកខ្មៅរូបនេះ បានជម្រុញឲ្យប្រជាជនចេញមកធ្វើការតវ៉ាប្រឆាំងចំពោះអំពើហឹង្សារបស់ប៉ូលីស និងមានការដុតភ្លើងនៅតាមដងវីថី និងក្បែរភោជនីយដ្ឋាន ដែលជាកន្លែងកើតហេតុ ជម្រុញឲ្យក្រុមប៉ូលីសធ្វើការតបត ដោយការបាញ់ឧស្ម័នទឹកភ្នែក និងគ្រាប់បែកហ្វ្លាស (Flash Grenade) ដើម្បីបំបែកហ្វូងអ្នកតវ៉ា។
អាជ្ញាធរបាននិយាយថា លោក រីសឆាត ប៊្រុក ដែលមានអាយុ ២៧ឆ្នាំ បានព្យាយាមរត់គេចពីប៉ូលីសកាលពីយប់ថ្ងៃសុក្រ បន្ទាប់ពីធ្វើតេស្តរកសារធាតុស្រវឹង និងបានឆក់យកកាំភ្លើងឆក់ពីមន្រ្តីប៉ូលីសម្នាក់ អំឡុងពេលប្រតាយប្រតប់។ ចៅហ្វាយក្រុង លោកស្រី បត់ថុម បាននិយាយថា បើតាមរូបភាពពីកាមេរ៉ាសុវត្ថិភាព បានបង្ហាញថា លោកប្រ៊ុក ហាក់ដូចជាបានបាញ់កាំភ្លើងឆក់មកលើប៉ូលីស ដែលកំពុងរត់តាមគាត់។ ប៉ុន្តែលោកស្រីនៅតែគិតថា សកម្មភាពនេះមិនអាចធ្វើឲ្យប៉ូលីសមានសិទ្ធប្រើប្រាស់អាវុធក្នុងការបាញ់សម្លាប់គាត់នោះទេ។
គួររំលឹកផងដែរថា បន្ទាប់ពីការស្លាប់របស់លោក ចច ហ្វ្លយ ដោយសារតែកងកម្លាំងប៉ូលីស ធ្វើឲ្យមានការតវ៉ាប្រឆាំងទូទាំងសហរដ្ឋអាមេរិក និងជម្រុញឲ្យមានការប្រឈមមុខដាក់គ្នារវាងកងកម្លាំងប៉ូលីស និងក្រុមអ្នកតវ៉ា។
ប្រភព៖ ញូយ៉កថាម