កិច្ចប្រជុំបែងចែកតួនាទីភារកិច្ច និងតំបន់គោលដៅ ភូមិសាស្ត្រទទួលខុសត្រូវ សម្រាប់ផ្នែកបញ្ជាចរាចរណ៍របស់ការិយាល័យនគរបាលចរាចរណ៍ផ្លូវគោក រាជធានីភ្នំពេញ

នៅរសៀលថ្ងៃទី០៧ ខែតុលា ឆ្នាំ២០២០ នៅសាលប្រជុំការិយាល័យនគរបាលចរាចរណ៍ផ្លូវគោក មានបើកកិច្ចប្រជុំបែងចែកតួនាទីភារកិច្ច និងបែងចែកតំបន់ គោលដៅ និងភូមិសាស្ត្រឲ្យទទួលខុសត្រូវ សម្រាប់ផ្នែកបញ្ជាចរាចរណ៍ទី១ និងផ្នែកបញ្ជាចរាចរណ៍ទី២ នៅការិយាល័យនគរបាលចរាចរណ៍ផ្លូវគោករាជធានីភ្នំពេញ ក្រោមការដឹកនាំប្រជុំដោយលោកវរសេនីយ៍ឯក សែម រតនា នាយការិយាល័យនគរបាលចរាចរណ៍ផ្លូវគោក ដែលមានសមាសភាពចូលរួមលោកនាយរងការិយាល័យ លោកនាយផ្នែកបញ្ជាចរាចរណ៍ទី១ និងទី២ និងលោកប្រធានគោលដៅ សរុប ៣៥នាក់។

ក្នុងកិច្ចប្រជុំនោះដែរ លោកនាយការិយាល័យ បានណែនាំដល់មន្ត្រីនគរបាលចរាចរណ៍ទាំងអស់ ត្រូវគោរពវិន័យកងកម្លាំងនគរបាលជាតិ ហើយត្រៀមចេញដោះស្រាយ ការកកស្ទះ ចរាចរណ៍ និងគោលដៅប្រឈមនានា ក្នុងរាជធានីភ្នំពេញ ជាពិសេសត្រូវកាត់សក់ឲ្យខ្លីសម្លៀកបំពាក់ឲ្យស្អាតជានិច្ច និងចូលរួមសហការគ្នា ដើម្បីដោះស្រាយបញ្ហានានា ពាក់ព័ន្ធជាមួយនឹងការកកស្ទះចរាចរណ៍ ត្រូវនាំគ្នាប្រើបេះដូងធ្វើការទាំងអស់គ្នា ដើម្បីភាពជោគជ័យរបស់អង្គភាព និងមុខមាត់របស់នគរបាលជាតិ ។

យោងតាមប្រសាសន៍របស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ មន្ត្រីគ្រប់រូបត្រូវបម្រើប្រជាពលរដ្ឋដោយចិត្តស្មោះត្រង់ ម៉ឺងម៉ាត់ទទួលខុសត្រូវខ្ពស់ចំពោះការងារ ត្រូវប្រើតួនាទីភារកិច្ចរបស់ខ្លួនឲ្យបានល្អ ពេលឃើញប្រជាពលរដ្ឋជួបទុក្ខលំបាកតាមដងផ្លូវនានា មិនថាករណីណាមួយកើតឡើងចំពោះពួកគាត់ ត្រូវគោរពស្រឡាញ់ប្រជាពលរដ្ឋទូទៅ គឺជាក្រមសីលធម៌មួយល្អប្រពៃរបស់កងកម្លាំងគ្រប់ៗគ្នា៕