ក្រុមហ៊ុន Huawei ទទួលបានការយល់ព្រមកាលពីថ្ងៃព្រហស្បតិ៍ដើម្បីសាងសង់រោងចក្រស្រាវជ្រាវដែលមានតម្លៃ ១,២៥ ពាន់លានដុល្លារនៅចក្រភពអង់គ្លេស។ ការប្រកាសនេះធ្វើឡើងនៅពេលដែលចក្រភពអង់គ្លេសកំពុងពិនិត្យមើលការចូលរួមរបស់ក្រុមហ៊ុនទូរគមនាគមន៍ចិននៅក្នុងបណ្តាញ 5G របស់ប្រទេស។
សេចក្តីប្រកាសព័ត៌មានរបស់ក្រុមហ៊ុន Huawei បានឱ្យដឹងថាកន្លែងដែលមានទំហំ ៩ ហិចតានៅក្នុងខេមប្រ៊ីជនឹងក្លាយជាទីស្នាក់ការកណ្តាលអន្តរជាតិនៃអាជីវកម្មទំនាក់ទំនងខ្សែកាបអុបទិករបស់ក្រុមហ៊ុន Huawei និងបង្កើតការងារបានប្រហែល ៤០០ កន្លែង។
ការវិនិយោគនេះកើតឡើងចំពេលវេលាដ៏រសើបសម្រាប់ក្រុមហ៊ុន។ ចក្រភពអង់គ្លេសកំពុងធ្វើការត្រួតពិនិត្យបញ្ហាសន្តិសុខសារជាថ្មីរបស់ក្រុមហ៊ុននេះ គឺត្រឹមតែបួនខែប៉ុណ្ណោះបន្ទាប់ពីនាយករដ្ឋមន្រ្តី Boris Johnson បដិសេធការជំទាស់របស់សហរដ្ឋអាមេរិកនិងបានផ្តល់សិទ្ធិឱ្យក្រុមហ៊ុន Huawei មានតួនាទីក្នុងការបង្កើតបណ្តាញឥតខ្សែ 5G ដែលភ្ជាប់បណ្តាញអ៊ីនធឺណេតជំនាន់ថ្មីរបស់ចក្រភពអង់គ្លេស។
សូមបញ្ជាក់ថា តាមច្បាប់របស់ប្រទេសចិន ក្រុមហ៊ុនចិនអាចត្រូវបានបញ្ជាឱ្យធ្វើសកម្មភាពផ្សេងៗ ក្រោមការដឹកនាំរបស់ទីក្រុងប៉េកាំង។ ក្រុមហ៊ុន Huawei បានបដិសេធយ៉ាងដាច់អហង្ការថាខ្លួននឹងមិនជួយរដ្ឋាភិបាលចិនក្នុងការធ្វើចារកម្មហើយនិយាយថាខ្លួនជា“ កម្មសិទ្ធ ១០០% របស់និយោជិក” ។
កាលពីថ្ងៃព្រហស្បតិ៍លោក Tony Blair អតីតនាយករដ្ឋមន្រ្តីចក្រភពអង់គ្លេស បានព្រមានថាចក្រភពអង់គ្លេសចាំបាច់ត្រូវស្របតាមសហរដ្ឋអាមេរិកក្នុងការរារាំងក្រុមហ៊ុន Huawei បង្កើតរោងចក្រក្នុងចក្រភពអង់គ្លេស ៕
ប្រភព៖ CNN.com
