-
ព័ត៌មានអន្តរជាតិ ២២ តុលា២០២០ប្រទេសវៀតណាម ៖ មនុស្សជាង ១០០នាក់ បានស្លាប់នៅក្នុងគ្រោះទឹកជំនន់ និងការបាក់ដីក្នុងតំបន់កណ្តាលនៃប្រទេសវៀតណាម
ព័ត៌មានបច្ចុប្បន្នភាពចុងក្រោយពីអាជ្ញាធរគ្រោះមហន្តរាយនៅប្រទេសវៀតណាមបានបង្ហាញថា ទឹកជំនន់ និងការបាក់ដីបានឆក់យកជីវិតមនុស្សចំនួន ១០២នាក់ នៅតាមបណ្តាខេត្តភាគកណ្តាលនៃប្រទេស ចាប់តាំងពីមានភ្លៀងធ្លាក់ខ្លាំងកាលពី ២ សប្តាហ៍មុន។ គិតមកត្រឹមពេលនេះ មនុស្សចំនួន ៤៨នាក់ បានស្លាប់នៅខេត្ត Quang Tri និង ២៧នាក់ នៅ Thua Thien Hue។ យ៉ាងហោចណាស់ផ្ទះចំនួន ១៧៨.០០០ខ្នង ត្រូវបានលិចដោយសារទឹកជំនន់។ ប្រជាជនជាង ៩០,០០០នាក់ បានជម្លៀសចេញពីផ្ទះរបស់ខ្លួន និងផ្លាស់ទៅតំបន់ដែលមានសុវត្ថិភាពក្នុងខេត្ត Ha Tinh, Quang Binh, Quang Tri, ខេត្ត Thua Thien-Hue ។ យោងតាមសមាគមកាកបាទក្រហមវៀតណាមបានឲ្យដឹងថា គ្រោះទឹកជំនន់ពេលនេះមានស្ថានភាពអាក្រក់បំផុត ដែលបានជួបប្រទះក្នុងប៉ុន្មានទសវត្សចុងក្រោយនេះ និងកំពុងជះឥទ្ធិពលអាក្រក់ដល់ជីវភាពរស់នៅរបស់ប្រជាជនរាប់លាននាក់ដែលកំពុងជួបនឹកការលំបាកដែលបណ្តាលមកពីជំងឺរាតត្បាតរ៉ាំរ៉ៃ Covid-19 ។ ភ្លៀងធ្លាក់ខ្លាំងនឹងកើតឡើង ដែលបណ្តាលមកពីខ្យល់ព្យុះត្រូពិក Saudel ដែលធ្វើដំណើរឆ្ពោះទៅប៉ែកខាងលិច នៃប្រទេសហ្វីលីពីន និងឆ្ពោះទៅកាន់ប្រទេសវៀតណាមក្នុងរយៈពេលប៉ុន្មានថ្ងៃខាងមុខនេះ៕ ប្រភព ៖ floodlist.com
-
ព័ត៌មានអន្តរជាតិ ១៦ តុលា២០២០ព័ត៌មានអន្តរជាតិ ៖ សាកសពចំនួន ១២ ត្រូវបានរកឃើញស្ថិតនៅក្រោមគំនរដី បាក់រលំនៅក្នុងប្រទេសវៀតណាម
កាលពីថ្ងៃព្រហស្បតិ៍ម្សិលមិញ អាជ្ញាធរប្រទេសវៀតណាមបានរកឃើញសាកសពរបស់ក្រុមសង្គ្រោះចំនួន ១២នាក់ ដែលបានកប់នៅពីក្រោមគំនរដីបាក់ និងបានបញ្ជាក់អំពីការស្លាប់របស់មនុស្ស ០៤នាក់ ផ្សេងទៀត ដែលបានបាត់ខ្លួន។ ការរកឃើញនេះ ធ្វើឲ្យចំនួនអ្នកស្លាប់ដោយសារគ្រោះទឹកជំនន់ និងខ្យល់ព្យុះនៅក្នុងប្រទេសវៀតណាមកើនឡើងដល់ ៤៩នាក់។ អាជ្ញាធរបាននាំសាកសពទាំងនោះទៅកាន់មន្ទីរពេទ្យនៅក្បែរនោះ ដើម្បីធ្វើការកំណត់រកអត្តសញ្ញាណបន្តទៀត។ ខណៈពេលនេះដែរ កម្លាំងសង្គ្រោះបន្ទាន់នៅតែបន្តការស្វែងរកមនុស្សចំនួន ០៤នាក់ ទៀត ដែលត្រូវបានជឿជាក់ថា បានកប់នៅពីក្រោមគំនរដីដែលបានបាក់នោះ។ មកទល់ពេលនេះ វាសនារបស់អ្នកសង្គ្រោះទាំងនោះនៅមិនទាន់ដឹងច្បាស់នៅឡើយទេ។ គួររំលឹកផងដែរថា តំបន់កណ្តាលនៃប្រទេសវៀតណាមបានរងការប៉ះពាល់ដោយចំនួនទឹកភ្លៀងធ្លាក់ខ្លាំងចាប់តាំងពីថ្ងៃអង្គារ ខណៈពេលដែលខ្យល់ព្យុះចំនួន ០២ បានបំផ្លិចបំផ្លាញតំបន់មាត់សមុទ្រ។ ភ្លៀងច្រើនសន្ធឹកសន្ធាប់បានបង្កឲ្យមានមនុស្សស្លាប់ចំនួនច្រើនជាង ៥០នាក់ និងធ្វើឲ្យលិចលង់ផ្ទះប្រជាពលរដ្ឋចំនួន ១៥០.០០០ ខ្នង និង សាលារៀនចំនួន ២៤៤ខ្នង នៅក្នុងតំបន់។ ជំនន់ទឹកភ្លៀង និង ការបាក់ដី ត្រូវបានរំពឹងថានឹងកើតមានក្នុងរយៈពេលប៉ុន្មានថ្ងៃខាងមុខនេះ បន្ទាប់ពីខ្យល់ព្យុះ ណាំងកា បានមកដល់តំបន់កណ្តាលនៃប្រទេសកាលពីថ្ងៃពុធកន្លងមកនេះ។ អាជ្ញាធរនៅតែមានក្តីបារម្ភថា ស្ថានភាពនឹងកាន់តែធ្ងន់ធ្ងរ ខណៈពេលវិសម្ពាធទាបមួយទៀតកំពុងគ្របដណ្តបតំបន់ឆ្នេរ ដែលបានទទួលរងគ្រោះរួមកហើយ៕ ប្រភព ៖ nnn.ng
-
ព័ត៌មានអន្តរជាតិ ១៤ តុលា២០២០ព័ត៌មានអន្តរជាតិ ៖ ព្យុះ ណាងកា ត្រូវបានគេព្យាករណ៍ថានឹងវាយប្រហារតំបន់ផ្សេងៗ នៅក្នុងប្រទេសវៀតណាមនារសៀលនេះ
យោងតាមការព្យាករណ៍របស់មជ្ឈមណ្ឌលជាតិ សម្រាប់ឧតុនិយមវិទ្យាបានឱ្យដឹងថា នៅថ្ងៃទី ១៤ ខែតុលា ឆ្នាំ២០២០ នេះ ព្យុះ ណាងកា នឹងបោកបក់មកលើ តំបន់កណ្តាលនៃប្រទេសវៀតណាម ដែលមានចម្ងាយប្រមាណ ៧០ គីឡូម៉ែត្រ ភាគអាគ្នេយ៍នៃកោះ បាសឡុងវី ដែលមានកម្លាំងខ្យល់ ៧៥-៩០ គីឡូម៉ែត្រក្នុងមួយម៉ោង។ ភ្លៀងធ្លាក់ខ្លាំងនឹងបង្កឱ្យមានហានិភ័យខ្ពស់នៃការបាក់ដី នៅតំបន់រ៉ែធ្យូងថ្មនៅក្នុងខេត្ត Quang Ninh ។ អាជ្ញាធរក្នុងខេត្ត ថាញហាវ បានចេញសេចក្តីប្រកាសជាបន្ទាន់ដើម្បីឆ្លើយតបនឹងព្យុះ ណាងកា នេះ។ កប៉ាល់ និងទូកក្នុងស្រុកជាង ៧.០០០ គ្រឿង ត្រូវបានជូនដំណឹងអំពីព្យុះ។ ទន្ទឹមនឹងនេះដែរ លោក ហ្វាង ភុកឡាំ អនុប្រធានមជ្ឈមណ្ឌលជាតិ ព្យាករណ៍ឧតុនិយមវិទ្យា បានឲ្យដឹងថា វិសម្ពាធទាបមួយទៀតបានលេចចេញនៅតំបន់សមុទ្រនៅភាគខាងកើតនៃប្រទេសហ្វីលីពីន។ វិសម្ពាធទាបនេះនឹងផ្លាស់ទៅសមុទ្រខាងកើត នៅថ្ងៃទី ១៥ ខែតុលា ធ្វើឲ្យប្រទេសវៀតណាមនឹងទទួលនូវបរិមាណទឹកភ្លៀងជាច្រើន៕ ប្រភព ៖ vietnaminsider.vn
-
ព័ត៌មានអន្តរជាតិ ១២ តុលា២០២០ព័ត៌មានអន្តរជាតិ ៖ ជំនន់ទឹកភ្លៀងធ្វើឲ្យប្រជាជនរាប់ពាន់នាក់គ្មានទីលំនៅ តាមតំបន់ទន្លេមេគ្គង
គ្រួសាររាប់រយគ្រួសារនៅក្នុងខេត្តចំនួន ៣ នៃប្រទេសកម្ពុជា គឺខេត្តពោធិ៍សាត់ បាត់ដំបង និងប៉ៃលិន ត្រូវបានបង្ខំឱ្យជម្លៀសចេញ នៅពេលមានភ្លៀងធ្លាក់ខ្លាំង ដែលបញ្ជាក់ពីការមកដល់នៃវិសម្ពាធទាប់ទូទាំងតំបន់មេគង្គ។ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយកម្ពុជា បានប្រាប់ទីភ្នាក់ងារសារព័ត៌មាន AFP កាលពីយប់ថ្ងៃសៅរ៍ថា “កុមារអាយុ ២ឆ្នាំ និងបុរសអាយុ ៥៧ឆ្នាំ បានលង់ទឹកស្លាប់ដោយសារទឹកជំនន់” ។ នៅភាគកណ្តាលប្រទេសវៀតណាម ទឹកភ្លៀងជិតមួយម៉ែត្របានធ្លាក់ចុះក្នុងរយៈពេលប៉ុន្មានថ្ងៃកន្លងមកនេះ។ អាជ្ញាធរគ្រប់គ្រងគ្រោះមហន្តរាយបាននិយាយថា មនុស្ស ៥នាក់ បានស្លាប់និង ៨នាក់ ផ្សេងទៀតកំពុងបាត់ខ្លួន ខណៈទឹកជំនន់បានជន់លិចផ្ទះជាង ៣៣.០០០ខ្នង និង បង្ខំឲ្យ មនុស្សជាង ២៦.០០០នាក់ ជម្លៀសចេញ។ នៅក្នុងប្រទេសថៃ ផ្លូវថ្នល់ប្រែទៅជាទន្លេ និងទឹកបានលិចលង់ទ្រព្យសម្បត្តិនៅក្នុងខេត្ត ណាខនរ៉ាក់ស៊ីម៉ា របស់ប្រទេសថៃ ខណៈពេលដែលអ្នកស្រុកបាននាំគ្នាដាក់បាវខ្សាច់ដើម្បីទប់ទឹក និងរើឥវ៉ាន់ទៅកន្លែងខ្ពស់។ អភិបាលខេត្តលោក វីចៀន ចន្ត្រានុតថៃ បានមានប្រសាសន៍ថា សង្កាត់ប៉ាកជុងគឺជាតំបន់រងគ្រោះខ្លាំងជាងគេ ដោយមានប្រជាជន ៨០០០ គ្រួសារ និងប្រជាជនចំនួន ១២.០០០នាក់ រងផលប៉ះពាល់។ ផ្ទះប្រមាណ ២០០ខ្នង ត្រូវបានជន់លិច។ […]
-
ព័ត៌មានអន្តរជាតិ ១២ តុលា២០២០ព័ត៌មានអន្តរជាតិ ៖ យ៉ាងហោចណាស់មនុស្សចំនួន ១៧នាក់ បានស្លាប់ដោយសារទឹកជំនន់នៅក្នុងប្រទេសវៀតណាម
ប្រព័ន្ធផ្សព្វផ្សាយរដ្ឋបានឲ្យដឹងកាលពីថ្ងៃអាទិត្យ (ថ្ងៃទី ១១ ខែតុលា) ថា យ៉ាងហោចណាស់មានមនុស្សចំនួន ១៧នាក់ បានស្លាប់ដោយសារទឹកជំនន់នៅតាមបណ្តាខេត្តភាគកណ្តាលរបស់ប្រទេសវៀតណាមកាលពីសប្តាហ៍មុន ហើយមនុស្សចំនួន ១៣នាក់ ផ្សេងទៀតកំពុងបាត់ខ្លួននៅឡើយ។ ទូរទស្សន៍វៀតណាម VTV បានរាយការណ៍ថា នៅប៉ុន្មានថ្ងៃខាងមុខ ខេត្តនៅតំបន់កណ្តាលនឹងត្រៀមសម្រាប់ព្យុះទីហ្វុងមួយទៀតឈ្មោះ លីនហ្វា ដែលនឹងនាំមកនូវភ្លៀងយ៉ាងច្រើន និងបង្កជាទឹកជំនន់ថែមទៀត។ តាមរយៈវីដេអូដែលបានផ្សាយដោយទូរទស្សន៍ VTV បានបង្ហាញ អ្នកនេសាទត្រូវបានជួយសង្គ្រោះដោយឆ្មាំសមុទ្រ និងឧទ្ធម្ភាគចក្រ ខណៈដែលខ្យល់ខ្លាំងបានបោកបក់ឆ្នេរសមុទ្រវៀតណាមភាគកណ្តាល នៅក្នុងខេត្ត ក្វាងទ្រី។ បើយោងតាមរបាយការណ៍របស់រដ្ឋាភិបាលបានឲ្យដឹងថា ទឹកជំនន់បានកាត់ផ្តាច់ការផ្គត់ផ្គង់ស្បៀងអាហារដល់ប្រជាជនរាប់ពាន់នាក់។ ប្រជាជនប្រមាណ ៣១.០០០នាក់ ត្រូវបានផ្លាស់ទីលំនៅ ហើយផ្ទះជាង ៣៣.០០០ខ្នង ត្រូវបានជន់លិច និងខូចខាតដោយសារទឹកជំនន់៕ ប្រភព ៖ channelnewsasia.com
-
ព័ត៌មានអន្តរជាតិ ១ តុលា២០២០ពត៍មានអន្តរជាតិ ៖ សិង្ហបុរីនឹងដកការរឹតត្បិតព្រំដែនសម្រាប់ភ្ញៀវទេសចរមកពីប្រទេសវៀតណាមចាប់ពីថ្ងៃទី ៨ ខែតុលា នេះតទៅ
អាជ្ញាធរអាកាសចរណ៍ស៊ីវិលសិង្ហបុរី (CAAS) បាននិយាយថា សិង្ហបុរីនឹងដកការរឹតត្បិតព្រំដែនជាឯកតោភាគីចំពោះភ្ញៀវទេសចរ ដែលមកពីប្រទេសវៀតណាម និងអូស្ត្រាលី ដោយមិនរាប់បញ្ចូលរដ្ឋវិចតូរីយ៉ា ចាប់ពីថ្ងៃទី ៨ ខែតុលា នេះតទៅ។ អាជ្ញាធរវៀតណាមបាននិយាយនៅថ្ងៃទី ៣០ ខែកញ្ញាថា ប្រទេសទាំងពីរនេះមានប្រព័ន្ធឃ្លាំមើលសុខភាពសាធារណៈគ្រប់ជ្រុងជ្រោយ និងបានគ្រប់គ្រងដោយជោគជ័យនូវការរីករាលដាលនៃវីរុស Covid-19។ អាជ្ញាធរបានបន្តថា “ ហានិភ័យនៃការនាំចូលពីប្រទេសទាំងនេះគឺទាប ” ។ យោងតាមសារព័ត៌មាន The Straits Times បានរាយការណ៍ថា ប្រទេសវៀតណាម និងអូស្ត្រាលីបានចូលរួមជាមួយនឹងប្រទេសណូវែលហ្សេឡង់ និងប្រ៊ុយណេ ដែលជាប្រទេសទាំងបួន ដែលប្រទេសសឹង្ហបូរីបានបើកព្រំដែនរបស់ខ្លួនជាឯកតោភាគីជាមួយ នៅក្នុងកិច្ចប្រឹងប្រែងដើម្បីជំរុញឱ្យវិស័យទេសចរណ៍ និងទីផ្សារទេសចរណ៍របស់ខ្លួនរស់ឡើងវិញ៕ ប្រភព ៖ vietnamtimes.org.vn
-
ព័ត៌មានអន្តរជាតិ ១ តុលា២០២០ព័ត៌មានអន្តរជាតិ ៖ ក្រុមហ៊ុនអាកាសចរណ៍អាមេរិក (American Airlines) នឹងបញ្ឈប់បុគ្គលិកចំនួន ១៩.០០០នាក់
បើយោងតាមនាយកប្រតិបត្តិលោក Doug Parker បាននិយាយនៅក្នុងអនុស្សរណៈមួយទៅកាន់និយោជិកកាលពីថ្ងៃពុធថា ក្រុមហ៊ុនអាកាសចរណ៍អាមេរិក (American Airlines) នឹងបញ្ឈប់បុគ្គលិកចំនួន ១៩.០០០នាក់ នៅថ្ងៃព្រហស្បតិ៍នេះ។ ក្រុមហ៊ុនអាកាសចរណ៍អាមេរិកនេះ បានស្នើសុំឱ្យសភាសហរដ្ឋអាមេរិកធ្វើការពន្យារពេលកម្មវិធីគាំទ្រប្រាក់ឈ្នួលចំនួន ២៥ពាន់លានដុល្លារ ដែលការពារការងាររហូតដល់ថ្ងៃទី ១ ខែតុលា រយៈពេល ៦ ខែទៀត ប៉ុន្តែរហូតមកដល់ពេលនេះ មិនទាន់មានកិច្ចព្រមព្រៀងណាមួយត្រូវបានធ្វើឡើងនៅឡើយទេ៕ ប្រភព ៖ channelnewsasia.com
-
ព័ត៌មានអន្តរជាតិ ១៥ កញ្ញា ២០២០ប្រទេសឥណ្ឌូនេស៊ី ៖ ក្រុមអ្នកប្រឆាំងចំពោះការពាក់ម៉ាសការពារ ត្រូវបានបញ្ជាឲ្យជីកផ្នូរសម្រាប់កប់អ្នកជំងឺដែលស្លាប់ដោយវីរុស Covid-19 ចាត់ទុកជាទណ្ឌកម្ម
អាជ្ញាធរនៅក្នុងប្រទេសឥណ្ឌូនេស៊ីបានដាក់ចេញនូវទណ្ឌកម្មដ៏ចម្លែកមួយ ចំពោះអ្នកដែលមិនគោរពតាមបញ្ញត្តិសម្រាប់ទប់ស្កាត់ការរីករាលដាលវីរុស Covid-19។ បុរស ៨នាក់ដែលប្រកែកមិនព្រមពាក់ម៉ាសការពារ នៅតាមកន្លែងសាធារណៈ ត្រូវបានបញ្ជាឲ្យជីកផ្នូរសម្រាប់អ្នកដែលស្លាប់ ដោយសារវីរុស Covid-19 នៅក្នុងប្រទេសឥណ្ឌូនេស៊ី។ គួររំលឹកផងដែរថា ខេត្ត ចាវ៉ា ខាងកើត នៃប្រទេសឥណ្ឌូនេស៊ី បានអនុវត្តយ៉ាងតឹងរឹង ចំពោះការពាក់ម៉ាសការពារ នៅតាមកន្លែងសាធារណៈ ដើម្បីទប់ស្កាត់ការកើនឡើង នៃការឆ្លងវីរុស Covid-19។ ការដាក់ទណ្ឌកម្មត្រូវបានអនុវត្តនៅក្នុងស្រុក Cerme ដែលជាកន្លែងដែលចៅហ្វាយស្រុក លោក Suyono បាននិយាយថា លោកបានដាក់ទណ្ឌកម្ម ដល់ប្រជាជនណាដែលមិនគោរពច្បាប់ (ពាក់ម៉ាសជាប្រចាំនៅតាមកន្លែងសាធារណៈ) ដោយតម្រូវឱ្យពួកគេជីកផ្នូរនៅទីបញ្ចុះសពមួយនៅក្នុងភូមិ Ngabetan ។ មនុស្សពីរនាក់ ត្រូវបានតម្រូវឲ្យទទួលខុសត្រូវចំពោះផ្នូរមួយ ដោយម្នាក់បានជីកផ្នូរ និងម្នាក់ទៀតដាក់ក្តារឈើ នៅខាងក្នុងដើម្បីទ្រទ្រង់សាកសព។ លោកចៅហ្វាយស្រុកសង្ឃឹមថា ការដាក់ទណ្ឌកម្មបែបនេះ អាចនឹងជាកត្តាមួយដើម្បី រារាំងប្រជាជនកុំឲ្យល្មើសច្បាប់នេះ និងដើម្បីទប់ស្កាត់ការរីករាលដាលនៃវីរុស Covid-19 នៅក្នុងខេត្ត៕ ប្រភព ៖ www.sbs.com.au
-
ព័ត៌មានអន្តរជាតិ ១៥ កញ្ញា ២០២០ព័ត៌មានអន្តរជាតិ ៖ ប្រទេសចិនរាយការណ៍ថាមានការឆ្លងថ្មីនៃវីរុស Covid-19 ចំនួន ៨ករណី ដែលសុទ្ធតែជាករណីនាំចូល
អាជ្ញាធរសុខាភិបាលជាតិរបស់ប្រទេសចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ (១៥ កញ្ញា) ថា ប្រទេសចិនបានរាយការណ៍នូវករណីថ្មីនៃការឆ្លងវីរុស Covid-19 ចំនួន ៨ករណី កាលពីថ្ងៃចន្ទកន្លងមកនេះ។ គណៈកម្មការសុខភាពជាតិបាននិយាយថា រាល់ករណី ដែលត្រូវបានរាយការណ៍ថ្មីៗទាំងអស់ ត្រូវបាននាំចូល ដោយអ្នកធ្វើដំណើរមកពីបរទេស។ គណៈកម្មការក៏បានរាយការណ៍អំពីករណីឆ្លងថ្មី ដោយមិនមានចេញរោគសញ្ញា ចំនួន ៩ករណី ផងដែរ គឺធ្លាក់ចុះពីចំនួន ៣៩ករណី កាលពីថ្ងៃមុននេះ។ ដូច្នេះ ចំនួនសរុបនៃការឆ្លងវីរុស Covid-19 នៅក្នុងប្រទេសចិន មានចំនួន ៨៥.២០២ នាក់។ ចំនួនអ្នកស្លាប់នៅតែមិនផ្លាស់ប្តូរ គឺចំនួន ៤.៦៣៤ នាក់៕
-
ព័ត៌មានអន្តរជាតិ ១៤ កញ្ញា ២០២០ព័ត៌មានអន្តរជាតិ ៖ ប្រទេសនូវែលសេឡង់នឹងដកចេញនូវការរឹតត្បិត ស្ទើរតែនៅទូទាំងប្រទេស នៅថ្ងៃទី ២១ ខែកញ្ញា នេះ
ប្រទេសនូវែលសេឡង់នឹងដកចេញនូវការរឹតត្បិត ស្ទើរតែនៅទូទាំងប្រទេស នៅថ្ងៃទី ២១ ខែកញ្ញា នេះ លើកលែងតែទីក្រុងធំបំផុតរបស់ខ្លួនគឺទីក្រុង Auckland ដែលជាចំណុចកណ្តាលនៃការឆ្លង នៅក្នុងរលកទី ២ នេះ ។ លោកស្រីនាយករដ្ឋមន្រ្តី Jacinda Ardern បាននិយាយកាលពីថ្ងៃចន្ទ (១៤ កញ្ញា) ថា ការរឹតត្បិតនៅក្នុងទីក្រុង Auckland នឹងត្រូវពិនិត្យឡើងវិញនៅសប្តាហ៍ក្រោយ។ លោកស្រីក៏បាននិយាយផងដែរថា នឹងមានការបន្ធូរបន្ថយរាល់តម្រូវការគម្លាតសុវត្ថិភាពនៅលើយន្តហោះ និង ការដឹកជញ្ជូនសាធារណៈផ្សេងទៀត។ គួររំលឹកផងដែរថា កាលពីចុងសប្តាហ៍កន្លងមកនេះ ប្រជាជនជាច្រើនបានប្រមូលផ្តុំគ្នានៅទីក្រុង Auckland ប្រឆាំងនឹងការរឹតត្បិតផ្នែកសង្គមរបស់រដ្ឋាភិបាល ដែលបានដាក់ចេញនៅក្នុងទីក្រុងធំបំផុតរបស់ប្រទេសនេះ បន្ទាប់ពីមានការផ្ទុះឡើងនៃវីរុស Covid-19 កាលពីខែមុន។ រូបភាពតាមរយៈប្រព័ន្ធផ្សព្វផ្សាយក្នុងស្រុកបានបង្ហាញពីហ្វូងមនុស្សយ៉ាងកកកុញ រាប់ពាន់នាក់ ដោយអ្នកចូលរួមជាច្រើនមិនបានពាក់ម៉ាស ធ្វើឲ្យមានក្តីបារម្ភអំពីការរីករាលដាលនៃវីរុស Covid-19 នៅក្នុងទីក្រុងនេះ៕ ប្រភព ៖ channelnewsasia.com
